Ivo Murgia

29/06/2006

Comunu de Sìnnia - Assessorau a sa Cultura
Assòtziu Culturali "Su Bentu Estu"

PRESENTADA-SPETÀCULU DE

"CRÒNACA DE UNA MORTI ANNUNTZIADA"

de Gabriel García Márquez
furriau in sardu de Ivu Mùrgia
Condaghes

Sìnnia, mèrcuris su 5 de argiolas, Pinacoteca Comunali, Bia Colleta n. 20 a is noi oras apusti cena:

Saludu de is autoridadis
Presentada de su lìburu cun:
Pàulu Tzedda, poeta e studiosu
Franciscu Cheratzu, editori
Ivu Mùrgia, autori

A is dexi:

Spetàculu-reading aundi un'atrixi tiatriali at a ligi partis de su lìburu acumpangiada de unu sonadori de trumba, cun:
Antunedda Puddu, atrixi
Ricardu Pitau, trumba

Postu de: is4morus a is 15:56 | link | commenti (5)

28/06/2006

BALLUS IN PRATZA

Ballu sardu in pratza su 2 de làmpadas in Cuartùciu, Pratza Santu Giorgi a is noi oras e mesu cun is tenoris de Orosei e de Nùgoro, Dàvidi Maxia (sonetu a butonis), Niàtziu Frau (launeddas), Càrulu Boeddu, Antoni Spiga e Giacu Longoni (sonetu) e Màriu Exana (sulitu).

Aparìciat "Sa scola de Ballu Sardu de Cuartùciu" e "Sa Tratamenta de Casteddu" cun s'agiudu de su comunu de Cuartùciu e de s'assessorau a is servìtzius sotzialis.

Seis totus cumbidaus a pigai parti a su spàssiu.

Gràtzias a Joyce Matu po sa sceda.

Postu de: is4morus a is 16:45 | link | commenti

27/06/2006

LITERADURA 1 GIOGRAFIA 0

Sa literadura bincit sa giografia 1 a 0. Po modu 'e nai, ma no meda. Giai chi su poderi de sa literadura podit fai cambiai finas is nòminis de is biddas. Iat a podi acontessi in Colòmbia anca sa bidda de Aracataca, aundi est nàsciu Gabriel García Márquez iat a podi cambiai nòmini in Macondo, sa bidda imbentada de su prèmiu Nobel in "Cien años de soledad". S'idea est de su sìndigu de sa bidda, anca bolit fai ponni unu cartellu in s'intrada cun sa scrita "Beni benius in sa bidda de su realismu màgicu". Su "realismu màgicu" est po is crìticus literàrius sa manera de scriri de Márquez. Sa literadura chi càmbiat sa geo-polìtica, fait spantu, mancai no siat sa primu borta.

In sa biddixedda ddui est giai sa domu-museu de Márquez, e unu pagheddu de turismu pròpiu po mori de sa fama mundiali de su scritori, ma no ddui est àcua bona a bufai. Sa poboresa est su sport prus connotu. A dda contai giusta s'idea de su sìndigu no est sceti de fai un'omàgiu a Márquez ma finas de nci podi guadangiai calincuna cositedda cun su turismu chi iat a depi aproillai cun is curiosus chi bolint biri sa bidda de Aracataca-Macondo. Un'arrexoni chi no depit parri prus "bàscia", o chi ndi sciùsciat totu sa poesia in una parti de su mundu anca s'apretu fait cumpangia de mengianu a meri' ma chi si iat a podi pensai cumenti a unu "parcu literàriu" de cuddus chi s'agàtant apetotu e in Sardìnnia puru in s'idea de podi fai cuncordai s'abisòngiu de dònnia di' cun sa bellesa de is lìteras.

E cumenti iat a sonai in logu nostu una cosa aici: Aristanis-Basciura o Nughedu-Biddavraigada?

Postu de: is4morus a is 15:39 | link | commenti

26/06/2006

CANTADAS CAMPIDANESAS

Martis su 27 in Cuartùciu, a is dexi cumenti e sempri, ant a cantai Orrù de Sìnnia, Marras de Cuartu S. A., Crisioni de Baronia e De Montis de Sant'Uanni Suèrgiu.

Mèrcuris su 28 in Assèmini, Orrù de Sìnnia, Zuncheddu de Brucei, Melis de Cuartu S. A. e Crisioni de Baronia.

Giòbia su 29 in Santu Perdu 'e Pula, Pani de Cuartu S. A., Saba de Terreseu (Narcau) e Vàrgiu de Cuartùciu.
Cenàbara su 30 in Dèximu 'e Putzu, Pani de Cuartu S. A., Saba de Terreseu, Vàrgiu de Cuartùciu e Fàlcui de Arriu Murtas (Narcau).

Domìnigu su 2 in Cabuderra, Saba de Terreseu, Mura de Teulada, Melis de Sant'Anna Arresi e Fàlcui de Arriu Murtas.

Pierpàulu Fàlcui est su cantadori prus giòvunu chi est cantendi, 23 annus, i est sa speràntzia noa de sa cantada campidanesa.

Postu de: is4morus a is 15:47 | link | commenti

23/06/2006

SU REGGAE DE IS "RATAPIGNATA" E SA TRUMBA DE RICARDU PITAU

Is "Ratapignata" ant sonau ariseru in Cuartùciu po sa festa de sa mùsica in unu cuntzertu apariciau de s'Arci. Is Ratapignata funt fortzis su mellus grupu reggae sardu, càntant in sardu campidanesu, e po cussu si praxint de prus puru!, e funt giai connotus in totu sa Sardìnnia e foras puru. Apitzus de su palcu ndi bògant un'energia spantosa chi luegus mùdat su cuntzertu in una festa e ariseru puru ant fatu sa parti insoru cun cantus e ballus. S'ùrtimu discu "Sighi Sighi" est una bella prova de is capassidadis de su grupu, sinnalau in medas arrevistas musicalis e bantau de is cumpetentis. Su giassu internet de is piciocus, ca funt totus giòvanus, est: www.ratapignata.org .

De no perdi nimancu su cuntzertu a s'obrescidroxu de sàbudu, faci a is cincu in su poetu de Cuartu Sant'Aleni in sa firmada de sa "Bussola", cun Ricardu Pitau a sa trumba e Robertu Pellegrini a is percussionis. Robertu Pellegrini est giai connotu e famau po tantis progetus suus, su prus nodiu fortzis est su chi tenit cun Entzu Favata, ma Ricardu Pitau puru est cumentzendi a essi unu nòmini pretziau po mori de un'iaxi de ideas, sonadas, grupus e progetus chi at pigau parti, cun artistas mannus puru, o chi est preparendi mancai siat ancora giòvunu. A chini nd'at a tenni gana de si ndi pesai unu pagheddu chitzi nd'at a balli de siguru sa pena.

Postu de: is4morus a is 10:41 | link | commenti (2)

22/06/2006

CANTADAS CAMPIDANESAS

Cantadas campidanesas custu acabu 'e cida in Sìnnia, Sètimu Santu Perdu e Donori. Cenàbara in Sìnnia, a is dexi, po Santa Itroxa ant a cantai Antoneddu Orrù de Sìnnia, Robertu Zuncheddu de Brucei, Marcu Melis de Cuartu Sant'Aleni e Antoni Crisioni de Baronia (Bidda Perùciu), a sa contra Pàulu Pilleri e Aldu Pitirra de Sìnnia.

Sàbudu in Sètimu po Sant'Uanni ant a cantai Omeru Atza de Sètimu, Antoni Pani de Cuartu S. A., Eliseu Vàrgiu de Cuartùciu e Antoni Mura de Teulada.

Sèmpiri sàbudu ma in Donori Orrù, Zuncheddu e Melis ant a torrai a cantai ma impari a Venutu Demontis de Sant'Uanni Suèrgiu po arregordai a su poeta Anselmu Melis.

Postu de: is4morus a is 08:08 | link | commenti

21/06/2006

S'ARRASSÌNNIA PRUS CUMPRETA

S'arrassìnnia de artìculus prus cumpreta a ingìriu de sa chistioni "Limba Sarda Comuna" dd'at fata Càralu Mulas in su logu web cosa sua, o giassu internet chi siat. Nd'at boddiu totu is parris, is propostas, is àutus ofitzialis e is stùdius bessius fintzas a oi in is giornalis sardus e "on line" puru. Difatis calincunu de custus artìculus est bessiu sceti on line ca is giornalis no dd'ant pubricau ca fiat scritu in sardu.
Una faina utilosa e chi podit agiudai a si formai un'idea de sa proposta regionali, ligendi s'opinioni de studiosus, scridoris e apassionaus chi intervenint in custa arrexonada.

innoi su liòngiu (link):
http://guide.supereva.com/lingua_sarda/interventi/2006/04/252379.shtml

Postu de: is4morus a is 07:34 | link | commenti

19/06/2006

CD consillau

Antoni Pani e Àrgia

"BÀSCIU E CONTRA"

Su mutetu, s'urrei de sa poesia improvisada campidanesa, s'atòbiat cun sa mùsica de is "Àrgia", cumenti a nai su cantadori cuartesu Antoni Pani, cun Alessi Manca e Antoni Mei a sa contra, s'atòbiat cun Albertu Balia, Arricu Fròngia e Màssimu Perra. E ndi bògant a pillu cosa de spantu. Su mutetu est su cantu sardu improvisau prus cumplicau, "capolavoru" de finesa mètrica connotu e studiau de totu is espertus mundialis de poesia improvisada e òspiti fissu de is festivals internatzionalis de cantadoris prus importantis. Oi una surra de pubricatzionis si funt interessendi de custu "cantu de sei" chi s'agàtat sceti in Sardìnnia, studiendindi sa mètrica, su tràgiu e s'acumpangiamentu e torrendiddi su postu chi ddi merescit in su cantu improvisau sardu e internatzionali. Forti de custus nùmerus e de unu connotu chi podit bantai sèculus de stòria, su mutetu si cunfròntat siguru cun sa mùsica de oi, chentza de timi ma antzis indullendi sa mùsica noa a ddi ponni infatu e a giogai cun is arrègulas suas. S'arresurtau est un'amesturu chi praxit, una cosa noa chi "funtziònat", gràtzias prus de totu a s'abilèntzia de is protagonistas de custu progetu, e chi tòcat a s'augurai chi potzat sighiri; pròpiu cumenti faint is launeddas o su cantu a tenori chi tenint unu connotu aici mannu chi no timint su cunfrontu cun sa mùsica noa ma antzis ddu cìrcant.

"Dopo gli altri successi con gli altri precedenti album gli Argia tornano alla ribalta con un lavoro nuovo di zecca e inedito in cui il gruppo affronta degli argomenti poco esplorati fino ad oggi e tanto vicino a loro: l’accostamento tra improvvisazione poetica e musica strumentale.
Un vero capolavoro che dopo vari esperimenti, oggi costituisce uno stimolo nei confronti della poesia improvvisata. 9 brani che vanno ascoltati per capire ed apprezzare le doti dei grandi Antonio Pani, Alberto Balia, Enrico Frongia, Massimo Perra, Alessio Manca e Antonio Mei."

Postu de: is4morus a is 10:57 | link | commenti

16/06/2006

"THE TIMES": SARDÌNNIA INDIPENDENTI IN SU 2020

Segundu su giornali ingresu "The Times", unu de is prus connotus e famaus de su mundu, sa Sardìnnia iat a podi essi una natzioni indipendenti in su 2020. Ddu nant Jeremy Page e Richard Beeston is autoris de s'artìculu "Calls for freedom make the jigsaw of Europe more complicated than ever" (prus o mancu: is tzerriadas a sa libertadi faint su "puzzle" europeu prus cumplicau) bessiu su 2 de làmpadas. Is duus autoris movint de s'ùrtima indipendèntzia decrarada in Europa, sa 'e su Montenegru, chi at fatu coràgiu a medas indipendentistas europeus, po chistionai de totu is stadus europeus chi funt torraus indipendentis apustis de s'arrutroxa de su muru de Berlinu e de su "blocu sovièticu". Pròpiu in cussas partis ddui est su nùmeru prus mannus de stadus noeddus e un'atru parit chi si depat aciungi in cabudanni, anca in Moldàvia fortzis ant a fai unu referendum po pratziri su stadu in duus, giai chi una parti de is chi ddui bivint sunfrint unu pagheddu de "nostalgia filu-soviètica".

Intantis faint notai is giornalistas, in totu s'Europa is movimentus indipendentistas àndant a innantis e s'amànniant, de is Bascus a is Cadalanus, passendi po is Scotzesus e is Irlandesus fintzas a arribai a is Corsicanus e a is Sardus.

S'idea chi ndi tenint is autoris est prus mala chi no bona, ca cumenti nant in s'artìculu etotu, custu iat a podi essi unu perìgulu mannu po is stadus natzionalis chi connosceus oi e finas po s'Europa chi pratzia in milli stadixeddus iat a essi prus dèbili meda, in s'idea de is autoris.

Is Galitzianus de "Galicia-Hoxe" no dd'ant pigada tropu beni e in su giornali on line insoru si funt chesciaus poita sa Galìtzia no cumparit tra is natzionis chi iant a podi essi indipendentis, candu issus dònnia di' funt cumbatendi po sa lìngua, giai co-ufitziali in Spànnia, po sa cultura e sa stòria insoru. Intamis si ndi spàntant chi ddui siat sa "Andalusia", cosa chi po is galitzianus amòstat ca "The Times" connoscit pagu s'arrealidadi spanniola e is movimentus polìticus suus.

E is Sardus? Fortzis su giornali est tropu otimista, no scieus calis siant is "fontis" suas, de siguru partidus indipendentistas gei nci nd'at in logu nostu, ma is arresurtaus eletoralis no si funt torrendi scedas tropu bonas e is chi creint chi una Sardìnnia indipendenti siat un'abetu e una spera giusta e cumbeniosa po is Sardus depit fai ancora unu bellu tretu, e in artziada puru.

Innoi su link a s'artìculu de "The Times":

http://www.timesonline.co.uk/article/0,,13509-2207534.html

e innoi su 'e "Galicia-Hoxe":

http://www.galicia-hoxe.com/index_2.php?idNoticia=55650

Postu de: is4morus a is 13:49 | link | commenti (1)

14/06/2006

SU MASTER SARDU E SA L.S.C.

Is studiantis de su Maistaxu Universidàriu de II gradu in "Acostamentu interdisciplinàriu a sa didàtica de su sardu" de sa Universidadi de Casteddu, pìgant positzioni in sa chistioni "Limba Sarda Comuna". E ddu faint in sa mellus manera; cun unu stùdiu aundi cunfròntant sa "Limba Sarda Unificada 2001" cun sa "Limba Sarda Comuna 2006". Su documentu est in sardu, campidanesu e logudoresu e in italianu puru. Movint de s'anàlisi de is scioberus polìticus, castiendi is puntus de fortza e is puntus de debilesa de sa proposta, àndant a spreculitai in totu is scioberus linguìsticus, arrìbant a is cunsiderus de didàtica e de s'arricida chi podit tenni intre is Sardus fintzas a proponni ideas chi podint amellorai sa LSC o a fai propostas noas candu su scioberu de sa regioni sarda parit chi pròpiu no potzat andai beni.
Unu traballu beni fatu diaderus, crìticu candu serbit ma sèmpiri "propositivu e costrutivu", pensau po su beni de totu is Sardus e de sa lìngua nosta e no po interessus "de campanili" o, peus puru, personalis.
Unu traballu chi imoi est giustu chi andit a su presidenti Soru e a s'assessora Pilia e chi girit in is mass mèdia isolanus po chi siat connotu e po chi totus si potzant fai un'idea de ita est diaderus sa "Limba Sarda Comuna" e de cumenti at caminau custu prutzessu de "standardizatzioni mediana" chi iant annuntziau in sa cunferèntzia de imprenta chi iant fatu unas cantu cidas a oi. Custu poita medas de is chi iant fatu "decraradas de printzìpiu" in favori de sa proposta polìtica po sa lìngua, chi prus o mancu totus acetaus, fortzis no iant acutu nimancu a dda ligi cussa proposta. Imoi ddu podint fai, cun un'ogu prus crìticu, gràtzias a custa bella faina.
Su traballu si podit ligi in su sìtiu ofitziali de su master (in is links) o in deretura innoi:

http://mastersardo.netsoul.net/

Su meri de domu

Cumentus

Fotografias

Amigus

Mesis

Genias

Funt agiudendi

Feeds

Contadori