Ivo Murgia

30/11/2006

"BINU... E CONTUS DE FORREDDA" IN SÌNNIA

Custa coa de cida in Sìnnia in sa domu campidanesa de su "Gruppo Folk Sinnai" in Bia Arrocheddas 57, ant a fai s'atòbiu culturali "Binu... e contus de forredda". Ddui ant a essi poetas e scridoris in lìngua sarda chi ant a ligi is contus e is poesias insoru, sonadoris de launeddas, fotografias antigas e unu bellu cumbidu cun castàngia, fa' cun lardu e binu de ses cantinas de su Campidanu e de su Sarrabus.

Dd'ant a incingiai sàbudu su 2 a is dexi de a mengianu i at a èssiri oberta fintzas a domìnigu a is otu de a meri'.

Labai de benni ca nci seu deu puru e si spassiaus!

Postu de: is4morus a is 17:13 | link | commenti (1)

28/11/2006

FAINAS DE CALIDADI IN S'ARRETZA
Primu parti

Si presentu unus cantu situs de fainas de calidadi in lìngua sarda.
1. Francu De Fabiis m'at scritu sinnalendimia ca su liceu de Calufuote (Ìsula de Santu Perdu) at fatu unu bellu traballu cuncodrendi unu fueddàriu Italianu-Tabarkinu-Sardu. Lassu fueddai a Francu etotu: "In su giassu de sa scola nc'est sa crupeca de custu fuedhàriu e che amostu totu sa tàula de sa lìtera G. Custu trabballu s'est pòtziu fai po sa sensibbilidadi manna meda chi nc'est in Calufuote, U paise, po sa lìngua fuedhada de totu is biventis. S'àtera diri apu sighiu is intervistas po su chistionàriu chi est cuncodrendi s'arregioni sarda cun s'Universidadi sarda e apu ascurtau custas intervistas in sa bidha etotu. Est sa circa sòtziu linguìstiga chi amancat, de sèmpiri, po biri cumenti impunnai cun sa lìngua sarda in is scolas e in sa sotziedadi, totu, sarda. Chi ligeis benis in mesu a chini at cuncodrau su trabballu de su Fuedhàriu ITACA nc'est su nòmini de Ninu Sedha e su trabballu de is scientis cosa sua, su babbu de Frantziscu Sedha. Ninu at scritu un'àteru lìbburu apitzus de s'Arrepùbriga de Calufuote cuncodrada in su 1793, ma de custu lìbburu nd'eus a torrai a chistionai prus ainnantis".
http://www.liceocarloforte.org/
2. Rina Brundu, ollastina de Biddanoa Strisàili "in trasferta" in Irlanda, giai de diora est mandendi a innantis su situ suu de literadura in italianu e in sardu puru, ospitendi autoris e promovendi paricis atividadis culturalis. Custas dis on line podeis agatai finas un'artìculu de Màriu Puddu chi a mei m'est pràxiu meda.
http://www.terzapaginaworld.com/
3. Su blog de Bardaneri pùbricat cosa in sardu fatu fatu, tradusiduras de poesia de totu su mundu in campidanesu e in logudoresu e ddu fait beni puru. Tzertas tòcant diaderus su coru siat in s'originali ma, po su chi si praxit a nosu, in lìngua sarda puru.
http://www.bardaneri.splinder.com/tag/traduzioni_in_sardo

Postu de: is4morus a is 16:10 | link | commenti (6)

27/11/2006

CANTADORIS IN CASTEDDU

Mèrcuris su 29 de donniasantu in Casteddu, Bia "San Giovanni", in su pub "La Tana del Luppolo" a is dexi, a su noti, ddui at a essi un'atòbiu de cantadoris campidanesus. No at a essi una cantada ma un'atòbiu culturali po intendi calincunu esempru de is maneras de cantai de sei a sa moda campidanesa. Ant a pigai parti a su spetàculu unus cantu cantadoris de sa scola de poesia de Sìnnia ghiada de Pàulu Tzedda.
Is cantadoris ant a essi: Pàulu Tzedda etotu, Pieru Lussu, Tanieli Filia, Cèsari Melis, Giginu Exana, Antoninu Grifagno. Bàsciu: Tore Exana, contra: Nicolau Di Notarpietro, ghitarra: Luca Tiddia.

Postu de: is4morus a is 15:46 | link | commenti (3)

23/11/2006

IS 50 ANNUS DE SU PRÈMIU OTZIERI

Cabudanni 1956, Festa de s'Arremèdiu, Utieri. Antoni Ledda tenit sa pensada de ndi strantaxai unu prèmiu literàriu in lìngua sarda. No fiat de diora meda chi su fascismu fiat acabau e no fiant stètius tempus bellus po su sardu, intzandus dònnia agiudu donau a sa lìngua sarda podiat essi bonu, màssimu unu prèmiu literàriu.
Fortzis chi si dd'iant nau a Antoni Ledda no nc'iat crètiu chi cuddu premieddu chi fiat nascendi iat a essi bessiu su prèmiu literàriu prus importanti de Sardìnnia e su "babu" de tantis atrus cuncursus.
50 annus nci funt passaus. Oi su prèmiu de Utieri est su bisu de dònnia poeta e scridori, su prèmiu prus mannu po is chi scrint in sardu, de chini frighendisindi de dinai e de fama sighit a andai a manu contrària finas candu dd'iat a cumbenni de prus a scriri in italianu, ca medas bortas cussus sceti parint is chi faint cultura in logu nostu.
50 annus nci funt passaus e sa lìngua sarda no dd'ant spèrdia ancora, po sorti manna nosta, mancai nc'apant provau. Antzis, cumenti nàrat Nicolau Tanda su presidenti de sa giuria de su prèmiu, sa literadura in lìngua sarda in certus logus si dda imbìdiant puru. Mancai oi siat disconnota e no tengat su logu chi ddi merescit in is giornalis e in sa televisioni, custu seu nendiddu deu; ma sa stòria s'at a donai arrexoni, dd'iat nau cuddu.
E arribeus a oi, sàbudu su 25 a is 4 de a meri' in su tzentru de cultura "Santu Frantziscu" de Utieri etotu ant a afestai cumenti si spètat custus 50 annus de cultura sarda cun is autoridadis de sa bidda, Vitòriu Ledda su presidenti de su prèmiu, Antoni Canalis su segretàriu, Nicolau Tanda su presidenti de sa giuria i a prus is bincidoris de su prèmiu in is 50 annus de sa stòria sua e atrus cumponentis stòricus de sa giuria po ndi pesai unu "Senau" de su prèmiu.
Ddui ant a essi Clara Farina e Ninu Pericu puru chi ant a ligi poesias premiadas in Utieri peri totu is editzionis.
A is 6 ant a presentai su logu web de su prèmiu anca funt arregollendi totu is poesias e is contus de is partecipantis a su cuncursu de sa primu editzioni fintzas a oi.
Pàulu Pillonca at a conduxi totu s'atòbiu.

Postu de: is4morus a is 17:12 | link | commenti (9)

20/11/2006

GRÀTZIAS O SIMONA!

M'est doveri chi torri gràtzias a Simona Salis chi pustis de essi lìgiu su post chi chistiònat de issa in custu blog m'at mandau su cd a domu po mi dd'ascurtai, e ascurtau mi ddu seu.

Su chi potzu aciungi a su chi emu scritu s'àtara 'orta est ca is cantzonis suas funt bellas diaderus, siat in sa mùsica e siat in is fueddus e in su cantu ca Simona tenit una boxi incantadora, cumenti at giai nau atra genti primu de mei.

M'intendu de augurai a Simona totu su beni chi ddi merescit po custa faina bella chi est mandendi a innantis, sperendi de dda podi intendi cantendi in logu nostu e no sceti in su discu.

Brava Simona sighi diaici e gràtzias torra!

Postu de: is4morus a is 16:22 | link | commenti (13)

16/11/2006

IS "GIALLUS" IN SARDU DE "SARDEGNA OGGI"

Is de su giornali on line "Sardegna Oggi" ant tentu sa bella pensada de pubricai in su giassu cosa insoru unas cantu puntadas de su cartoni animau "I gialli del Prof. Marras" in italianu e in sardu puru. Chi cracais in su link chi seu ponendi in bàsciu si podeis scioberai sa puntada chi prus s'agràdat e cun su butoneddu a colori 'e castàngia chi ddui est in giossu a manu manca ddi podeis cambiai sa lìngua e si bieis s'episòdiu in sardu. Su traballu de furriai in sardu is "giallus" dd'at fatu Robertu Spanu.

A mei mi funt partus beni fatus e mi funt pràxius e duncas ddus sinnalu e ddus consillu a totus.

Labai innoi su liòngiu:

http://www.sardegnaoggi.it/gialli/player.php

Postu de: is4morus a is 18:20 | link | commenti (11)

13/11/2006

LÌBURUS: PRESENTADA DE GIUSEPI PILI

Sàbudu su 18 a is cincu in sa domu de is Melis de Cursu Gramsci in Cabuderra su studiosu Giusepi Pili at a presentai duus traballus suus: "I colori. Analisi lessicografica dei dialetti del Sulcis linguistico", Grafica del Parteolla e "Su corpus, sa personi. Dizionario del corpo umano: analisi lessicografica del dialetto di Capoterra", Condaghes.

S'autori, is editoris e is aministradoris de Cabuderra cumbìdant a totus a bandai i a pigai parti a s'atòbiu. Ddui ant a essi su studiosu Màriu Puddu e s'assessori a sa cultura de Cabuderra Oresti Pili.

Duas òperas de importu mannu funt, chi emu giai sinnalau in custu blog etotu (sa 'e is coloris):
http://www.ivomurgia.splinder.com/post/8853391

s'atra dda podeis agatai innoi:

http://www.condaghes.com/scheda.asp?id=88-7356-092-X

Gràtzias a Francu De Fabiis po sa sceda.

Postu de: is4morus a is 16:46 | link | commenti (12)

09/11/2006

SU PANI IN SU CONNOTU CUARTESU

Un'amosta de su pani cuartesu po sa cida chi ìntrat in Cuartu Sant'Aleni. Cun s'agiudu de unus cantu forrus de su pani cuartesus e de Tziu Luiginu Sitzia maistu mannu de pani e de drucis de sa de tres tzitadis de Sardìnnia. At a essi in is aposentus de su Guventu in Bia "Brigata Sassari" su 14 de donniasantu a is dexi de a mengianu. A su noti, a is noi oras ant a fai una cunferèntzia puru, sèmpiri in su Guventu cun Aldu Cinus.

Interessanti s'amosta e cumprimentus a is apariciadoris chi ant aprontau totu is manifestus in sardu puru cun s'agiudu de su "Ufils" su Ufìtziu de sa Lìngua Sarda de su cumunu de Cuartu Sant'Aleni.

Postu de: is4morus a is 16:41 | link | commenti (5)

08/11/2006

"CANTUS E NODAS" IN SESTU

Tòrrant ocannu puru in Sestu is cunferèntzias-cuntzertu de su etnomusicòlogu Marcu Lutzu apitzu de unus cantu temas de mùsica sarda. Ocannu passau iant chistionau de su "cantu de sei", sa poesia improvisada in Campidanu e in Cabesusu e de launeddas, ocannu in tres sàbudus ant a chistionai:
su 11 de donniasantu a is 4 e mesu in s'aposentu de su consillu comunali de Sestu, de sa mùsica sarda noa tra traditzioni, world music e rap, cun Sandra Ligas (http://www.sandraligas.com), Gemiliano Cabras e Reverendo Jones(http://www.myspace.com/reverendojones);
su 18, a sa pròpiu ora e in su pròpiu logu, de gòcius e de arrosàrius, cun Adalgisa Loi e sa cunfraria "La Confraternita del Santissimo Rosario" de Mòguru;
su 25, a sa pròpiu ora e in su pròpiu logu, de fisarmònica e de sonetu a butonis cun Fiorentinu Piras, Robertu Fadda e is grupus folk de Sestu "San Gemiliano" e "I Nuraghi".
In is tres sàbudus ant a fai una cunferèntzia in is scolas puru, a mengianu. Po is atras scedas fait a tzerriai a custu nùmuru: 3387085411.
De is atòbius de ocannu passau iant imprentau unu lìburu de grandu capia: http://www.ivomurgia.splinder.com/post/7699753

Postu de: is4morus a is 18:28 | link | commenti

06/11/2006

UNA BOXI NOA IN SARDU

Una boxi noa in sardu in su panorama de sa mùsica isolana. Noa po mei assumancu. Seu chistionendi de Simona Salis, casteddaja ma chi est bivendi in continenti giai de diora. Girendi in internet apu agatau su giassu cosa sua cun totu is scedas chi podint serbiri a dda connosci mellus e a s'ascurtai una tastadura de is cantzonis suas. Sèmpiri in s'arretza fait a agatai "recensionis" de "Chistionada de mei" s'ùrtimu traballu suu, anca su interessu e is lodis funt medas e arrìbant fintzas a dda paragonai a Norah Jones. Sa boxi sua est bella e melodiosa ma po su chi spètat a mei dda connòsciu tropu pagu po mi ndi podi formai un'idei e potzu nai sceti chi sa faina mi parit beni fata e interessanti. Abetu duncas a dda podi ascurtai mellus, mancai in unu cuntzertu in terra nosta.

Po is chi ndi bolint sciri de prus, labai innoi:

http://www.simonasalis.com

http://www.myspace.com/simonasalis

Su meri de domu

Cumentus

Fotografias

Amigus

Mesis

Genias

Funt agiudendi

Feeds

Contadori