Ivo Murgia

27/12/2006

SU CALENDÀRIU SARDU

Ocannu puru est spacendi i est tempus de pensai a su fatu i a su de fai. In custas dis funt bessendi paricis calendàrius, calincunu in sardu puru. A mei mi praxit a sinnalai su de s'amigu Francu De Fabiis chi no dd'arroscit mai de studiai, scriri e pubricai in sardu. E difatis at pensau a unu calendàriu puru, impari a atrus amigus, cun totu is festas chi teneus in logu nostu, scritas in sardu, po sighiri a afestai "arriendi, gioghendi, festendi, ligendi e scriendi in sardu" cumenti nàrat Francu etotu. Est unu traballu de totu e po totu sa Sardìnnia chi s'autori bolit cumpartiri cun totus, finas arricendi cunsillus e aciuntas, i est pensau cumenti e un'istrina po totu is Sardus po "s'allirgai su coru in custus tempus nieddus e si lassai po unu sùspidu de s'ànima a si perdi in mesu de una de custas festas" sighit Francu. E intzandus gosaisiddu de parti mia puru.

Calendàriu Sardu

Postu de: is4morus a is 16:59 | link | commenti (9)

21/12/2006

MERCADEDDU DE PASCHIXEDDA

Unus cantu militantis de su partidu indipendentista sardu "Sardigna Natzione" ocannu puru ant torrau a apariciai unu mercadeddu de paschixedda po bendi cratzonis, cropetus, camisas e berritas sardas, arresojas, mallieteddas, banderas, cds de mùsica sarda i atras cositeddas a baratu po depi guadangiai unu pagheddu de dinai po su partidu insoru. Lassu fueddai a issus etotu: "Aici comenti is annus passaus, custa borta puru sa Seu de Casteddu de Sardigna Natzioni Indipendentzia apariciat su mercadeddu de Paschixedda. Si agatant cosas a su pretziu chi ddi dexit e su guadangiu serbit a poderai s'autofinantziadura de s'atividadi. Ti abetaus insandus in Via S.Giovanni 234 in Casteddu".
Chi teneis ancora dinai de spendi po is strinas de paschixedda baxeiddoi.
Gràtzias a Bepi Perra po sa sceda.

Postu de: is4morus a is 17:52 | link | commenti (8)

18/12/2006

IS "BALENTES" E SU SARDU PRUS POÈTICU N. 2

Is "Balentes" su grupu etno-pop in sardu tòrrant a chistionai de cudd'artìculu de "L'Unione Sarda" chi emu sinnalau innoi etotu. Si bolint discurpai chi ant ofèndiu a calincunu acrarendi chi issas no faint peruna "crassìfica" de sa lìngua sarda e bolint abarrai a foras de certas chistionis de sardu beru o prus pagu beru. In su liòngiu chi seu ponendi in bàsciu e in sa pàgini infatu ddui est totu s'arrexonada. Is Balentes assegùrant chi is scioberus insoru funt musicalis sceti ma, a su chi parit, no totus ndi funt cumbintus de custa cosa...
Forum Balentes

Postu de: is4morus a is 17:13 | link | commenti (2)

14/12/2006

ATÒBIUS IN CUARTU E IN SÌNNIA

Duus atòbius de cultura in Cuartu e in Sìnnia. In Cuartu cenàbara su 15 de mesi 'e idas a is 7 in su guventu de Sant'Àgata, cun s'agiudu de s'Assessorau a is Polìtigas po su Spetàculu, Connotu e Lìngua Sarda, ddui at a essi su cumbènniu "S'ànima de Cuartu in is contus, is arregordus e in sa lìngua" cun Càralu Pillai, Anna Maria Steri e is "Contixeddus cuartesus" (Alfa Editrixi) chi ant a ligi Arrita Murgioni e Giuanni Olla. Infatu Pepinu Pateri at a allirgai s'atòbiu cun is cantus de su connotu.

In Sìnnia sèmpiri cenàbara ancora cantus de su connotu apariciaus de s'assòtziu culturali "Su Bentu Estu" in su tiatru tzìvicu a is 8 e mesu cun Antoninu Grifagno, Andria Pisu a is launeddas, Giorgia Loi i atrus.

Sàbudu in su pròpiu logu a is 9 oras torra Andria Pisu in cuntzertu cun su tenori de Bitzi e Pieru Marras.

Gràtzias a Marcu Sitzia i a Nicolau De Notarpietro po is scedas.

Postu de: is4morus a is 10:43 | link | commenti (4)

11/12/2006

FAINAS DE CALIDADI IN S'ARRETZA
Segundu parti

1. Lone Elisabeth Olesen sa circadrixi danesa at incingiau unu blog sardu-danesu-ingresu-italianu, gei est pagu!, in su giassu suu. E su nai chi s'agàtat ancora genti chi nàrat ca studiendi su sardu improddaus s'italianu o chi abisòngiat a imparai s'ingresu sceti e atrus scimpròrius diaici! Mancu mali chi sa cumproa si dda dònat una stràngia aici no podint mancu nai ca is Sardus seus sèmpiri provincialis, serraus etc. etc.
Custas dis on line ddui est una bella poesia in sardu.
http://www.geocities.com/moorella/mooblog.html
2. Toninu Rubattu in su giassu cosa sua at pubricau totu is traballus suus, poesias e tradutzionis cumenti a s'Iliade e s'Odissea in sardu e su fueddàriu suu "universali". Difatis in su "DULS" ddui funt totu is fueddadas sardas i a prus su fueddu in italianu, ingresu, frantzesu, castillianu e tedescu. Depu nai ca custu de su "ditzionàriu universali" est unu traballu spantosu diaderus chi dònat un'agiudu mannu a totu is chi bolint traballai cun su sardu cumparendi totu is fueddadas de s'ìsula nosta cun atras fueddadas stràngias.
http://www.toninorubattu.it/ita/top.htm
3. Su tempus de is cantadas po ocannu puru est spaciau ma po no si ndi scaresci de ita est su cantai de sei in Sardìnnia si podeis torrai a ligi custu artìculu bellu meda de Pàulu Tzedda su studiosu e poeta chi deu apu furriau in sardu e ascurtai una pariga de esemprus de mutetus a sa moda campidanesa.
De is giassus de Càralu Mulas e Danieli Sanna.
http://guide.dada.net/lingua_sarda/interventi/2006/07/261687.shtml
http://www.sardu.net/dir/cantada_campidanesa/index.asp
4. Aprètzius mannus a su Comunu de Mòguru chi s'est cuncordau unu situ totu in sardu bellu meda. Aici totus. Po ddu biri abàstat a intrai in su situ ofitziali de su comunu i a cracai in sa bandera de is cuatru morus a manu maista in artu.
http://www.comune.mogoro.or.it/
5. M'at scritu Francu De Fabiis faendimì sciri ca est acanta 'e bessiri s'editzioni 2007 de sa carta de Sardìnnia in sardu; previdit de dda fai bessiri in gennaxu prus o mancu. In su interis mi sinnàlat cust'artìculu stòricu po sa carta cosa sua in su giornali de is disterraus sardus.
Ligeisiddu ca est interessanti, a su costau ddui est un'atru boboeddu, unu contixeddu spassiosu e fungudu de Frantziscu Màsala.
http://82.85.18.146/messaggero/1983_dicembre_22.pdf

Postu de: is4morus a is 17:26 | link | commenti (4)

10/12/2006

CANTU A TENORI IN CASTEDDU

Martis su 12 de mesi 'e idas a is 5 de a meri' in su cunservatòriu de Casteddu po su "Festival Spazio Musica" ant a fai un'atòbiu-cuntzertu de cantu a tenori. Ddui ant a essi Nàssiu Macchiarella chi at a fai un'arrelata apitzu de is "Chistionis de stili in sa mùsica de su connotu" e Bustianu Pilosu chi at a fueddai de "Su stili de su cantu a tenori".

Ant a pigai parti a s'atòbiu finas duus tenoris: "Supramonte" de Orgòsulu (Egìdiu Mattana boxi, Francu Patteri contra, Pascali Patteri bàsciu e Francu Dàvoli mesu boxi) e "Arborinu" de Oruni (Àngiulu Soma i Antoni Tolu boxis, Pepinu Cidda contra, Perdu Mula bàsciu, Pieru Cidda mesu boxi).

Gràtzias a Ignazio Macchiarella su Professori po sa sceda.

Postu de: is4morus a is 10:52 | link | commenti (7)

07/12/2006

"UNU DE DANIMARCA BENIT A CARCULAI" IN ORTACESUS

Sàbudu su 9 in Ortacesus, in s'aposentu de is cungressus, a is cuatru e mesu ant a fai un'atòbiu curturali po arregordai a sa bonànima de Andreas Fridolin Weis Bentzon, in su celu siat po totu su beni chi at fatu a sa Sardìnnia, e su traballu suu in Ortacesus intra su 1957 e su 1962. Su grandu circadori danesu iat arregistrau paricis cantadoris ortacesajus, dilentantis puru, chi Danti Olianas at arregortu in duus cds e unu lìburu cun s'agiudu de sa Regioni Sarda e de s'aministratzioni de Ortacesus. Sàbudu ant a presentai custus duus discus e ant a fai una cunferèntzia puru cun Pàulu Tzedda poeta e studiosu, Adrian Bentzon fradi de Andreas, Felici Mereu sìndigu de Ortacesus, Jorgen Sonne i Arìstidi Murru chi iant agiudau a Bentzon in cussus annus, Torben Lundbæk diretori de su Museu Natzionali de Danimarca, Danti Olianas de s'assòtziu Iscàndula curadori de s'òpera e Giacu Serreli giornalista chi at a conduxi s'atòbiu. A is noi oras ant a donai su film "Is Launeddas, Sa mùsica de is Sardus" e infatu ant a sonai is sonadoris de launeddas Giuanni Tronci, Samueli Corbeddu, Giusepi Orrù, Rentzu Zucca, Andria Pisu e su cantadori Tziu Antoninu Grifagno. Fintzas a su 10 de mesi 'e idas in sa "ludoteca" de Ortacesus ddui at a essi un'amosta de is fotografias de Bentzon.
In artu una fotografia chi iat tirau Bentzon in Ortacesus in su 1958 cun su sonadori de launeddas Dionisu Burranca, su primu a manu manca a ullieras, e is cantantis Àngiulu Pili e Giusepi Lecca.

Postu de: is4morus a is 16:38 | link | commenti (4)

05/12/2006

AMIGUS DE SU FRIULI

Custas dis m'at scritu Andria Venier, Dree in friulanu, de su blog in lìngua friuliana "Il furlanist" e m'at propostu de "gemellai" is blogs nostus.
Mancu a ddu nai apu acetau cun grandu prexeri, cuntentu de s'interessu chi custu amigu friulanu at tentu po custa faina cosa mia e po sa lìngua nosta. In Friuli cumenti e in Sardìnnia s'arrialidadi de sa lìngua minoritària est cumplessa i est malu a dda presentai in pagus fueddus ma mi intendu de nai chi po certas chistionis, innias funt prus a innantis de nosu.
Cumenti si siat s'idea m'est parta bona meda e atrivia puru ca in una comunidadi manna cumenti a "splinder", cun prus de 200.000 blogs, is chi manixaus una lìngua minoritària seus pagus diaderus e po custu ddi torru gràtzias.
Mancai diaici perou, "Il furlanist" tenit unu muntoni de abisitas, prus o mancu 200 a sa di' ma chi podint lompi fintzas a 300 in certas dis i est unu sìtiu nodiu po totu is chistionis de sa lìngua friulana. Dd'agatais in is links e po chini bolit aprofondiri labai unus cantu giassus de interèssiu in friulanu: "Il Portâl de Lenghe Furlane" unu situ de novas, "La radio Libare dai Furlans" un'arràdiu lìbera, "La Patrie dal Friûl" giornali stòricu de su friulanismu cun prus de 60 annus de atividadi e un'atru blog; totus in friulanu.
www.lenghe.net
www.friul.it
www.friul.net

www.christianromanini.it

Postu de: is4morus a is 16:35 | link | commenti (6)

04/12/2006

CURSU DE LAUNEDDAS

Tòrrant a partiri is cursus de launeddas in Cuartu Sant'Aleni gràtzias a su interessamentu de s'Assessorau a is Polìtigas po su Spetàculu, Connotu e Lìngua Sarda. Ocannu puru su maistu de is sonus de canna at a essi Orlandu Maxia de Mara. Po si depi assentai abisòngiat a tzerriai a s'assòtziu "Ballu Tundu", fintzas a su 7 de mesi 'e idas, a su nùmuru 070789671 o 3383264819.
Is interessaus podint fintzas mandai una e-mail a: ballutundu@tiscali.it .
Su cursu at a inghitzai custu mesi etotu.

Postu de: is4morus a is 16:41 | link | commenti (3)

02/12/2006

"SONUS DE ATÒNGIU" IN CUARTU E IN CASTEDDU

Duus mesis de spetàculus in Cuartu Sant'Aleni e in Casteddu po arregordai a Antoninu Medas, guasilesu, s'atori de tiatru in sardu prus mannu de sa stòria, chi po sa mannària cosa sua dd'iant fintzas paragonau a Eduardu De Filippo. A dex'annus de sa dispidida sua is apariciadoris ant pensau a duus festivals diferentis: "Sèmidas, Mùsica e Fueddus" asuba de sa lìngua sarda e "Una Sinfonia po Antoninu" omàgiu musicali a s'artista. S'incumentzu de "Sèmidas, Mùsica e Fueddus" est po oi etotu in s'auditorium de Bia Turati a is 9 oras cun is contus de Gianluca Medas e is mùsicas de Francu Oppo dirìgias de Giacu Medas. I ancora:
Domìnigu su 10 a is 7 in s'auditorium de Bia Turati, "Pinocchio" in sardu, torra cun Giuanluca Medas impari a Simoneta Soro e cun is mùsicas de Etori Pezzoli dirìgias de Giacu Medas;
Sàbudu su 16, in su pròpiu logu a is 9 oras, "Antine, Passirillanti, Acuedda", Prokofiev in sardu cun Gianluca Medas e is mùsicas de Francu Corda, Gianfrancu Meloni, Rentzu Zucca i Arricardu Leone;
Mèrcuris su 20 in s'auditorium a is 9 oras, "Histoire du Soldat" de Stravinskij in sardu cun Gianluca Medas acumpangiau de una truma de mùsica "da camera" dirìgia de Giacu Medas.
"Sinfonia po Antoninu" invècias at a incumentzai su 14 in Casteddu in su Cunvitu de Bia Mannu a is 10 e mesu, a mengianu, cun su cumbènniu "Simpritzidadi e talentu de atori" cun Gianluca Medas, Giùliu Angioni, 'Idu Biolchini, Màriu Faticoni, Giuanni Olla, Entzu Parodo i atrus. Sa pròpiu di' a is 9 oras, a su noti, in s'auditorium de Pratza Detori in Casteddu, "Bachis" unu spetàculu tiatrali de sa cumèdia de Antoni Garau cun Gianlunca Medas e is mùsicas originalis de Giacu Medas.
Cenàbara su 5 in Cuartu, Bia Turati a is 9 oras, a su noti, "Tziu Paddori" de Efis Bissenti Melis cun is fradis Medas e is mùsicas de Lao Silesu dirìgias de Giacu Medas;
Sàbudu su 6 de gennaxu sèmpiri in Bia Turati, "Is màscaras de Antoninu", su film de su spetàculu de "Tziu Paddori" de E. B. Melis;
Cenàbara su 12 a is 9 oras, su film de "Basciura" de Antoni Garau cun mùsicas sonadas in presèntzia e dirìgias de Giacu Medas;
Sàbudu su 13, a sa pròpiu ora e in su pròpiu logu, "Cuatru stòrias de su Campidanu de Antoninu" cun Aleni Ledda, Simoneta Soro e un'orchestra dirìgia de Giacu Medas;
Cenàbara su 19 torra in Casteddu in s'auditorium de Pratza Detori a is 9 oras, su spetàculu "Cinixu" cun Giuanni Garroni, Pierpàulu Piludu e is mùsicas originalis de Giacu Medas;
Sàbudu su 20, in s'auditoriu casteddaju a is 9 oras, su film de su spetàculu de "Su mundu de Tziu Bachis" de Antoni Garau cun Entzu Parodo e is mùsicas de Giacu Medas;
Cenàbara su 26 in Cuartu a is 10 e mesu, a mengianu, in su Guventu de Bia Brigata Sassari, ant a presentai su lìburu "a fumetus" de Bepi Vigna e Miali Pala "Basciura". A su noti a is 9 oras in Bia Turati, "Su Bandidori" de E. B. Melis cun Aleni Ledda, Simoneta Soro e Màuru Palmas;
Sàbudu su 27 in Bia Turati a is 9 oras, su film de su spetàculu de "Su Bandidori" cun mùsicas de Màuru Palmas.
In dònnia spetàculu ddui ant a essi is fotografias de Antoninu Medas peri totu sa carriera sua.
Is billetus còstant 5 francus nous. "Sonus de Atòngiu" dd'ant apariciau cun s'agiudu de su Comunu de Cuartu Sant'Aleni, sa Provìncia de Casteddu e sa Regioni Sarda.

Su meri de domu

Cumentus

Fotografias

Amigus

Mesis

Genias

Funt agiudendi

Feeds

Contadori