Ivo Murgia

31/12/2007

ANNU NOU

Chi s'annu nou s'acantzit totu su chi disigiais!

A si biri sanus e allirgus ocannu chi benit!

Balla! mi seu sprecau...

Postu de: is4morus a is 11:34 | link | commenti (5)

27/12/2007

BALLU SARDU

Sàbudu su 29, de is 7 de a meri' in sa domu de is Angionis in Cuartùciu, 'satzada' de ballu sardu cun d-un'iaxi de sonadoris e de baddadoris de totu su Campidanu de Casteddu.
Gei ddu scieis ca a chini nci bògat s'annu baddendi, agoa bàddat totu s'annu!

Postu de: is4morus a is 09:59 | link | commenti (8)

24/12/2007

GNOVIS TINDINCIS

'Gnovis tindincis di une musiche antighe' est su tìtulu in 'furlan' de un'articuleddu chi apu scritu po su nùmeru de mesi 'e idas de 'La Patrie dal Friûl'. Chistiònat de su chi est sutzedendi in su mundu de sa 'mùsica sarda'.
Custas 'listas' funt sèmpiri lègias ca calincunu nd'abàrrat a foras e timis po no ofendi sa genti. Tòcat a tenni passièntzia, un'artìculu est sceti un'artìculu, cun òbrigus de longària, no est un'enciclopedia de sa mùsica sarda, totu totu no ddui podit capi.
In d-un'atra ocasioni gei at a fai a arrexonai de atras chistionis, arremonendi a atrus artistas e a atrus sonadoris.
Po is chi si bolint 'lanciai' cun su friulanu, ddu podint agatai innoi
In su pdf in bàsciu si nci pongu s'artìculu in italianu.

Postu de: is4morus a is 10:03 | link | commenti (4)

21/12/2007

SU CALENDÀRIU SARDU

Est sa faina noa de Francu De Fabiis, cun d-una surra de scedas e de informus totus in sardu, cun is festas de is biddas nostas e sa longària de is diis de festa. Unu traballu obertu a consillus e a currigiduras chi donniunu podit fai cuntatendi in deretura a s'autori.

Custu de su calendàriu est un'atru traballu stòricu de Francu, impari a sa cartina, giai chi est mandendiddu a innantis de su 1985, chentza de ndi pigai un'arriali de dinai pùbricu, totu a fortza de volontariau e medas bortas perdendinci puru. Ita no fait sa passioni! Balla! maladia lègia sa lìngua sarda!

Calendàriu

Postu de: is4morus a is 13:42 | link | commenti (10)

20/12/2007

PRESENTADA IN SETZU

Custu sàbudu in Setzu ant a presentai su traballu 'Computer, memoria e vecchi mestieri' de Amos Cardia e Perdu Perra.

Ddui at a essi genti meda a arrelatai, aministradoris, linguistas, studiosus e finas sonadoris de launeddas.

Totu is scedas ddas agatais in su papereddu chi si pongu in bàsciu, e mi parit giustu a nai ca dd'ant fatu totu in sardu, su papereddu e su lìburu puru, togu aici!

Postu de: is4morus a is 09:22 | link | commenti (5)

19/12/2007

S'ORÌGINI DE IS SARDUS

Unu cumbènniu in Sìnnia in sa comunidadi de monti, cenàbara a is 6 de a meri', at a spriculitai custa chistioni, movendi de sa genètica po lompi a s'antropologia.

Ddui ant a essi professoris e circadoris de s'unversidadi de Casteddu e arrelatas apitzus de:

Is Sardus unu pòpulu o medas pòpulus, cun su professori Vona;

S'orìgini de is Sardus in sa genètica, cun sa dotorissa Calò;

Is sangunaus de is Sardus, cun su professori Sanna.

S'atòbiu dd'at aprontau su comunu de Sìnnia, assessorau a sa cultura e is assòtzius culturalis 'Media Mundi' e 'Su Bentu Estu'.

Postu de: is4morus a is 16:55 | link | commenti

M'ANT CONTAU

M'ant contau chi totu a iscusi a iscusi, parit chi s'amigu Càralu Mulas siat torrendi a pubricai cosa in sardu... mi parit de essi biu in su logu web cosa sua, duus o tres scritus nous, unu contixeddu toghixeddu e unu fueddarxu 'agiornau e arrexonau' de unus cantu fueddus nous de su sardu, toghixeddu cussu puru, antzis spassiosu forti e atra cosa puru.

Baxeiddoi ma no nareis nudda, ca desinuncas Càralu ddi pìgat timoria e si tòrrat a sparessi...
Càralu

Postu de: is4morus a is 10:19 | link | commenti (2)

18/12/2007

CD consillau

Bruno Camedda
DODILLAS
Frorias

Unu discu stravanau de unu sonadori stravanau. Una passillada in sa 'world music', cudda bona, movendi de su connotu sardu e passendi peri sa musica culta fintzas a is traditzionis popularis proventzalis e arabas, de Ravel a s'Irlanda, de Bentzon a Antoni Lara, de Efis Melis e Aurèliu Porcu a sa Spànnia, de sa Gaddura a sa Scòtzia, e a mei m'est partu de ddui essi intèndiu unu pagheddu de blues e de Goran Bregovic puru!
In custu cd ndi bessit a pillu crara crara totu s'abilèntzia, sa capassidadi e s'arti de custu sonadori e si cunfìrmat su chi sciemus giai, est a nai ca Brunu Camedda est unu grandu maistu de sonus, de fisarmònica e de sonetu a butonis, che a Fiorentinu Piras o a Nàssiu Erbì. Ma tenit fintzas cuddu atrivimentu de si circai atras camineras po depi agatai moris noeddus po sa mùsica sarda o po sa 'mùsica' cali si siat.
Imoi chi seu scriendi e in su interis mi seu sighendi a scurtai su discu, chi mi seu arregalau po paschixedda ca gei mi minescit!, mi parit de no podi agatai is fueddus giustus po nai cantu mi praxit, ma deu seu unu pagheddu strollicu puru ca candu una cosa mi àndat, mi infogu e intzandus no m'arrennescit prus a essi echilibrau o 'obietivu'.
Cumenti si siat, una cosa assumancu fait a dda nai, in custu traballu de Brunu eus agatau totu su che emus a bolli agatai sèmpiri in d-unu cd de un'artista sardu: tènnica e ànima, connoscèntzia e cuscièntzia de su connotu e gana de provai a proponni, arrispetu e arriscu, traballu sèriu e spàssiu, fantasia e gustu.
Po totu s'atru tòcat a tenni passièntzia ca no fait a spricai sa mùsica a fortza de fueddus, abisòngiat a marolla a si pigai su discu e a si dd'ascurtai.
Arregalaisiddu po paschixedda, nc'est su tanti e gei si minescit a bosatrus puru!
Una tastadura de su cd dda podeis agatai innoi

Postu de: is4morus a is 10:02 | link | commenti (8)

17/12/2007

USEDDUS

In Useddus (AR) cenàbara su 21 de mesi 'e idas a is 9 oras e mesu de a mengianu in s'aposentu mannu de su comunu, ant a fai un'atòbiu po arrexonai de sa lìngua sarda in sa scola.

Ddui ant a essi Susan Ecca oberadora de cultura, Antiogu Ghiani maistu de scola e scridori e Giuanni Casciu studiosu de lìngua sarda. Manìxat is traballus Pepi Manias.

Su progetu dd'at apariciau su comunu cun s'agiudu de s'ufìtziu de sa lìngua sarda e de sa lei 482.
In Useddus tenint fintzas su situ in sardu, castiai innoi

Postu de: is4morus a is 09:33 | link | commenti (2)

15/12/2007

IN SARDU EBBIA, IN SARDU SCETI

Est un'arrassìnnia de cantzonis in campidanesu e in logudoresu cun Otàviu Còngiu e Teu Spigno. Dd'aparìciat s'assòtziu de cultura 'G. Verdi' po cras a is 7 de a meri' in Pauli, Bia Traiano.

Chi est proendi e no nci podeis bessiri a fai gitas, baxeiddoi ca no nc'at manera mellus de nci passai su domìnigu, cun sa poesia sarda!

Su meri de domu

Cumentus

Fotografias

Amigus

Mesis

Genias

Funt agiudendi

Feeds

Contadori