Ivo Murgia

28/09/2007

SARDU IN CASTEDDU, IN PARTIOLLA E IN CUARTU

Bah custu acabu 'e cida si podeus divagai prus cuntentus puru cun custas novas bellas chi si ponint allirghia e abetu bonu in su coru! In Casteddu su consillu de su cìrculu scolàsticu "Randaccio" at aciuntu in is matèrias de sa scola elementari su sardu cumenti e matèria obrigatòria. S'idea est de Clàudiu Cugusi, su consilleri, e dd'ant aprovada giai giai a s'unanimidadi. Duncas sa lìngua sarda ìntrat in sa scola de manera ofitziali e a òbrigu po totu is scientis e no candu calincunu volontariosu si pìgat su stentu de ndi fai, mancai aforas de s'òrariu de is letzionis. Una bona nova diaderus, tòcat a si ndi prexai e a sperai chi atrus ndi pighint s'esempru, ca seus cumbintus diaderus chi custu siat su mori giustu. Ca pensaus chi tochit a movi de su sardu de su logu e a arrespetai sa fueddada de sa genti e no a fai minestronis chi no serbint a nudda e chi nci stèsiant is Sardus de sa lìngua insoru. Ca si unu si pènsat de presentai in d-una bidda unu sardu chi no est de cussu logu, est siguru chi at a faddiri de mala manera ma custu no nci bolit meda a ddu cumprendi, chi unu connoscit pagu pagu cumenti seus, is Sardus. E pensaus puru chi cumenti scint in paricis logus de su mundu, in chistionis de bilinguismu, abisòngit a tenni in grandu cunsideru sa capitali po creai cuddu "efetu dòminu" chi sutzedit sempri ca, chi si praxat o nou, totu is Sardus, de una manera o de s'atra, castiaus su chi fait Casteddu.

Casteddu

Mancu s'Unioni de is Comunus de su Partiolla bolint abarrai agoa cun is chistionis de su bilinguismu. Alloddu on line su giassu insoru totu in sardu, i est mannu puru!, cun totu is scedas e is fainas de is comunus chi pìgant parti a s'unioni tradùsias in campidanesu. Su traballu dd'at fatu Amos Cardia, s'oberadori de bilinguismu. Beni diaici duncas, s'atùrat sceti de ddis augurai sa mellus furtuna chentza de depi aciungi atra cosa.

Partiolla

Cuartu no sceti no abàrrat agoa ma antzis cumenti incapìtat in chistionis de lìngua sarda, medas bortas est su primu. Tòrrant a inghitzai is cursus de sardu chi at bòfiu su cumunu, gràtzias a sa lei 482 e cun su patrocìniu de sa Presidèntzia de su Consillu de is Ministrus e de sa RAS. Giai totu su cursu dd'ant a fai in sardu. Incumìntzant su 15 de mesi de ladàmini po tres mesis prus o mancu. Is docentis funt: Antiogu Ghiani, Franca Marcialis, Franciscu Cheratzu, Màriu Puddu, Duìliu Caoci, Franciscu Carboni, Càralu Pillai, Pàulu Tzedda e Dèbora Steri. Nc'at tempus fintzas a su 9 po s'assentai. Totu su programa dd'agatais in su link in bàsciu. Beni fatu diaderus custu puru!

Cuartu

Postu de: is4morus a is 11:57 | link | commenti (5)

Commenti

#1 01 Ottobre 2007 - 14:04

Bella nova balla po su ki spètat su sardu in scola. Tòcat a torrai gràtzias a Cugusi e speraus ki sa proposta bandit ainnantis e ki serbat cumenti de esèmpiu po is atras scolas puru. Po nai sa beridadi de Casteddu no mi dd'iap'essi mai abetau ca ddu scideus ca in tzitadi sa lìngua s'est pèrdia de prus ki no me is biddas. Si bit ca funt pighendu cusçèntzia de s'importàntzia de su sardu.

Po su situ de Partiolla seu prexau meda ca candu biu fainas de custa 'enia m'allìrgat su coru. Ki su jassu Comitau.org at lassau su scriri est ca Amos Cardia (su dirigidori de Comitau.org ) at tentu atra cosa de fa, traballai po costruiri su situ de Partiolla apuntu. Amos Cardia ddu puru connosceus po is librus cosa sua "Apedalla dimòniu" e "s'Italianu in Sardìnnia" ki s'ant amostau su valori mannu de obradori de bilinguismu ki issu tenit. Su si s'aguraus est ki agatit su tempus de torrai a donai boxi a Comitau.org.

Pàulu

utente anonimo

#2 01 Ottobre 2007 - 20:44

Oggi eravate sul TG5, hai sentito?
a si biri!

Guarda il mediablog (foto, audio e video) di questo utente.

dree

#3 02 Ottobre 2007 - 09:42

ellus nou!

http://www.video.mediaset.it/video.html?sito=tg5&data=2007/10/01&id=19969&categoria=servizio&from=email
mandi

is4morus

#4 05 Ottobre 2007 - 05:30

Magari l'avessero insegnato a me a scuola :(

Chee

#5 06 Ottobre 2007 - 23:34

Salude zente... seo inoghe po narrer, si potho, un parere contrariu. Deo pentzo chi 'oe che 'oe no est possibile imparare in iscola sa limba, ma cussa zusta!
Si non teneus unu "codice" o modellu de sighire, seus atzoroddande unu sardu "burdu".
S'idea naturalmente est de lodare... ma toccat a dhue andare cun "pes de prummu"!
Unu saludu a tottus!
(Ps. bisittai su zassu meu: zenius; est in fase de tribagliu, ma seis zente benènnida, e complimentos a Ivo Murgia!)

zenius

Commenti

Su meri de domu

Cumentus

Fotografias

Amigus

Mesis

Genias

Funt agiudendi

Feeds

Contadori

Postu de: is4morus a is 11:57 | link | commenti (5)