Ivo Murgia

A nci furriai sa poesia in d-un'atara lìngua est cosa chi no s'iat a depi fai,
poita in sa poesia est fondamentali su SIGNIFICANTE.
Po sa prosa si podit fai; ma candu in d-unu cuncursu in d-una lìngua beni pretzisa pedint sa tradutzioni in d-un'atara lìngua puru, insaras est una cosa chi no si cumprendit, e duncas fais beni a essi dudosu.
'e Si'

Ivixeddu stimau,
sa kistioni est ki in Sardìnnia puru seus pighendi is trassas malas italianas aundi is cosas no andant comenti iant a depi andai.
Spantau ? Ma pròpiu po nudda ca bastat a biri totu su burdellu ki est sutzedendi po su standard.
Ddoi at ancora kini nci stikit Gràssia Deledda in sa literadura sarda.
A s'acabu totu sa kistioni de sa lìngua (literadura, prèmius literàrius e standard) dd'ant a acabai ke a folclore (est jai sutzedendi candu intendu casteddajus o campidanesus ki no scint fueddai in sa bariedadi cosa insoru e pustis ddus bis cirkendi de kistionai in LSC).
Est unu mundu de untruxus aundi kini traballat po sa lìngua sarda ddu pigant ke terrorista. E in prus ddoi at ancora un'acostamentu tropu italianista a sa kistioni de parti de calincunu.
Asselia-tì e friga-ti-ndi.

Cun amigàntzia

Màssimu

Oioi Ivixeddu, ma "ci sei o ci fai?"
No siast aici notzenti, ca su mundu ti frigat!
Deu creu ca sa majoria de is prèmius literàrius oindii (sarvu pagu bessidas de arrègula, "eccezioni") tengant àteras tentas prus chi no sa de adelantai sa literadura sarda (ligi: finantziamentus, manifestadas localis, pregonàntzia turìstica, ecc.). Duncas est fàtzili a agatai giurias improvisadas de genti chi no cumprendit nudda de literadura e prus pagu puru de lìngua sarda (seu chistionendi-tì po sperièntzia dereta personali).
A s'àteru càbudu agatas sèmpiri is sòlitus spertus chi connoscint a is autoris de su stili insoru e prèmiant sceti a is chi connoscint. Mi parit ca inguni puru est comenti a totu is cuncursus a s'italiana!
Teni passièntzia (e no mandist prus nudda a is chi no si-ddu minescint)!
Stèvini

Ki est cumenti seis narendu ge seus fraddocus! Iat a tocai a ddus sbregungiri a cussus caddaionis, cussa gentixedda de cuatru soddus e candu si nd'acataus, assumancu po su ki podeus fai, candu ddu podeus fai, nosu ddu iaus a depi sminciri...
(mancai un'articuleddu in su jornali, mancai locali, mancai siat in italianu ca akino' no ddu ligint)
Pàulu