Lìngua e cultura sarda

TESI NOA DE FRANCU DE FABIIS


Francu De Fabiis at acabau un'atru "Maistraxu de Segundu Livellu in Linguìstiga, Filolugia e Literadura de sa Sardìnnia" in sa Universidadi de Casteddu e cumenti acostùmat a fai sa tesi sua dd'at scrita e discùtia in sardu. Aici totus. Custa borta s'argumentu est su lìburu "Mannigos de memoria", ISRE, de su grandu intelletuali Antoni Cossu de Santu Lussurzu. In partigulari s'argumentu de sa tesi est is "Piessinnus me in sa scridura de Antoni Cossu in s'arrumanzu Mannigos de Memoria" i est stètia discùtia in sa Universidadi de Casteddu su 19 de custu mesi; su professori chi dd'at presentau est Màriu Puddu, studiosu connotu e stimau, autori de su "Ditzionàriu" famau. Francu De Fabiis est prus de bint'annus produsendi cosa de brofetu in sardu, in s'atra tesixedda sua iat fueddau de "Po cantu Biddanoa" de Venutu Lobina e prima ancora de toponomàstica: sa cartina sua est giai un'acodeddu de stòria de sa polìtiga linguìstica in Sardìnnia.
Unu stùdiu aprofondiu chi si stèntat in su fueddai de sa vida de s'autori, de su suci de s'arrumanzu, de sa lìngua chi at imperau, de sa grafia e de totu sa sustàntzia de s'òpera cun una mirada sèmpiri originali e foras de is schemus cumenti solit fai Francu De Fabiis. Podeus nai ca is partis prus tènnicas pòrtant a su costau is cunsiderus personalis de De Fabiis chi cìrcat de cumprendi cumenti at traballau Antoni Cossu e de agatai sa crai po podi intrai in sa lògica cosa sua. Totu in una manera creativa chi est de De Fabiis sceti e chi a nosu si praxit meda.
Làstima solu chi totu custus traballus de vàllia ddus potzaus ligi sceti in s'arretza e s'autori no si siat galu detzìdiu a ndi fai unu libru o no nd'apat tentu s'ocasioni, cosa chi speraus potzat acadessi una di' o s'atra ca nc'est diaderus su tanti.
Po cumprendi de ita seus chistionendi abàstat a si conneti a su giassu:
http://www.monserratonews.it/defabiis/master3.htm#ftn28
Antoni Cossu est stètiu fintzas onorau de pagu cun un'atra pubricatzioni de sa Condaghes, un'arregorta de scritus de paricis autoris a incuru de sa filla Maria Giusepa. Innoi su liòngiu a su lìburu:
http://www.condaghes.com/scheda.asp?ver=it&id=88-7356-065-2

Postu de: is4morus a is 10:40 | link | commenti